اطلعت على موضوع الأخ محب الخير … على هذا الرابط

http://www.waraqat.net/3361

وبصراحة ما اعجبتني التعليقات على الصور

بعضها خطأ مثل وزارة الداخليه الله لا يعمينا كاتب انها وزارة الخارجية

لذلك التعليق باللون الأحمر هو ما كتبه لكم اخوكم سليمان

الرياض زمان أول 1961

قلبي تولع بالرياض *** حُبِ ورثته من الجدود

طيب مشكور مشكور

هذي ما علق عليها صاحبنا

ولكنها صورة لرجلين يحملان حزمتين من البرسيم

لكثرة مربي المواشي في منازلهم تلك الفترة قبل تعليب اللبن ومطرسة البنغال والهنادوة و كان البشت ضرورة

تلك الايام ولا يستغني عنه الناس عكس اليوم تلقى الشاب رايح للسوق بالشورت وللمسجد عياذا بالله

ببيجامة او قميص النوم وروائح من كل مايخطر ومالا يخطر على البال

محطة اليمامة هذي تقع بطريق المطار القديم وكانت تقريبا في آخر الرياض على مشارف المدينه

من جهتها الشمالية لاحقا اقيم فندق اليمامة عندها ….. اليوم سبحان الله تكاد تقول انها بالبطحاء

من قربها من مركز المدينه

كندادراي منافس للبيبسي في تلك الفتره

ما اخذ فتره طويله الا واغلق المصنع …قيل انه بسبب ذبابة وجدت في احدى الزجاجات

وقيل انه بسبب ان كندادراي تبيع في اسرائيل كما قيل عن الكوكاكولا… وكأن البيبسي

لا تباع في اسرائيل الغريب بقاء المقر مغلقا لسنوات زادت عن 30 سنه ولا ادري عن عدم

استغلال الموقع فقد كان في شارع الجامعه وهو شريان حيوي منذ زمن

دار الكتب

وياما على دار الكتب رحت واقفيت

وانا عليها كل يوم مسير>>> عاش مروس

كازينو الرياض

اي والله كازينو …

يمكن اللي انشأه متأثر بسفره سفرتين للقاهرة والا لبيرووووت

وكان متعشم يجيب صباح >>> ما تقصر راعية واجب الختياره

ومن ذيك السنين والشد شغال

الكراجات

ايه الكراجات الملكيه

آآآآبوك يالصالون الجمسي مدري الفورد .. الا بلى فورد و(في روايتن فرت حمر)

مزعلينه لا يا بابا

مبنى وزارة الخارجية

خارجية ايه الله لا يعمينا

يا ابني اللوحه واااااضحه وضوح شمعات ددسن توه مغيرهن

شركة بيبسي

ايه هذي اللي ما طرى عليها تصك مثل الكندادراي

إحدى الشركات

لا يا شيخ !! اظنها شركة الجبس الاهلية يعني المساهمة ههه

ما بي حيل اضحك

هذي ما علق عليها صاحبنا محب الخير

لكنها سيارتون بيضاءون اظنها بويك او بالعامية بيوك والوانها ميتاليك واللمعه بالك يا ولد

بس هاااه انتبهو ترى مهوب انا اللي جنب العمود يطالع في المصور

وهذي بعد ما علق عليها رفيقنا

ولكنها لسيارة خلفيتها تقول قطو توّه قايمن من النوووم على صوت واحد يكب زبالته

ياسلااااااااام يحتفل ويرقص اذا جاه باليوم واحد اثنين يعبون بنزين

مهو مثل اليوم الشباب دوران بالشوارع

ما ادري وين هالصورة ولكنها لجهة حكومية او قصر من المدخل يمين

وخر بس وخر توه صاقط على الجيب ( متجاوز ) تلقاه ماسط الطبلون يمشي 45كم/سا

ومن قده … كانت الجيب للضعوف ومستعملها قبله 7 او 9 اشخاص على الاقل

اهااااااااااا من اهم معالم الرياض…

مجرى البطحاء

حدث مرة في عام 1388هـ ان امتلأ بمياه الامطار وشاهدته شخصيا

هذا المجرى اعزكم الله هو الصرف الصحي ومكشوف طبعا

زي ما تشوف) >> مطلع اغنية

المجرى ازيل واستغل طريقا نتيجة للتطور والزحمة في

الشوارع كنا نعبر للجهة الاخرى عن طريق السير على المواسير

الموجوده شرط خلع الحذا … وبعضنا وش يخلع .. اصلا جاي

حافي يا كافي

سوق شعبي قديم

ايه سوق شعبي قديم !!!

هذا سوق الخضرة بالديرة

وين هالمسيره النسوية ؟!!!

اخر وحده عليها مخالفة رفع العباية … وحتى ما تنتقد من الجميع لزمت آآآآخر المسيرة

شكلهم رايحين للمتنفس الوحيد تلك الفترة انه المستوصف

إحدى الأعياد

هااااااذي شكلها بالأحساء وابو سيكل هذا شكله سواق بعد

اما الغسيل هنا !!!!

قمة استغلال الموارد توفير وغسيل كفرات

قيصرية اشيقر او اوشيقر… واليماني اللي كأنه نابليون هذا يبيع جرايد