

سؤال لكل عزوبي .. يتسدح بالملحق ؟
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم ..
او تنام في الشوارع كأنك قطو .. او تنام على الكنب وانت تقرأ الجريده ، او تنام ويطلع سرك ستر الله سرك.
إذا كانت الاجابة بنعم فإن
كل هذه اعراض لرغبة جامحه وكامنه بالزواج وان ما تلاحقت عمرك راح يجي اليوم اللي يقول فيه الوالد لك :
” الله لا يبارك في الساعة اللي جبنا فيها شغاله “.
لا تتخذ قرار الزواج إلا وانت في حالة هدوء تااام بعيدا عن الاثارة والعواطف الجياشه ..
مو تشوف فيديو كليب بعدها تطمر لأمك وانت مشبك اصابعك ومميل رقبتك وتقول :
( دوروا لي ابي اعرس ) ، ابي اكمل نصف ديني .
اولاً : مرحلة ما قبل الزواج :
كيف تعرف انك استويت عزيزي الشاب وحان قطافك من بنت الحلال :
أ: علامات الرغبة في الزواج عند الشاب :
1 – إذا بديت تحب الاغاني وتسمعها بمخمخه وتتخيل انك تقول الكلام لوحده .. فاعرف انك ( قاضي )
فتلاحق عمرك وشف لك بنت حلال ، بشرط توافر الشروط الاخرى فيك ( وظيفه مناسبة ، ومبالغ مالية
لمواجهة مصاريف العرس) >>>> التقسيط متاح بدون كفيل في مؤسسة مباري للعرس على النوته
كذلك إذا صرت تتابع الفيديو كليب وتهج اثمك ولو يناديك ابوك ما ترد عليه.
2– إذا بديت تقول يا زين بيروت والـ إل بي سي والمستقبل ؟ فاعلم اخي الاعزب انك لو انتظرت
سنتين ستصدّي صواميل ظهرك وتصير بلا مستقبل.
3– إذا بديت تمشى بالسوق وتتمنى ان البنت اللي قدامك يطيح اللي هي شايلته علشان تصدم فيها وتقول
( ليمون نعناعه ) فاعرف انك على مشارف انك تكون ( سبهه ) وشهار ما يقبلك ولا منتسب .
4 – إذا بديت تعطّر بعطور نسائيه وتقول ما فيها شيء ( العطورات ليست حكرا على احد ) ..
فاعرف انك بديت ( تخق ) لذلك اكرب عمرك واعرس.
ثانيا : اثناء الخطبة :
1 – انضبط وابدأ صل بالمسجد . واجعل المحافظة على الصلاة تحول دائم من الخطبة إلى آخر عمرك.
لان اهل البنت يبي يسألون شيبان المسجد ويقولون تعرفون فلان .. لذلك صل وابد ( طلطل )
بوجيه المصلين كأنك تدور اخوانك.<<<< ما احب هالحركه.
2 – لا تتهيبل وتروح تتسلف سيارة زميلك ( الفخمة ) وترزها عند باب اللي انت خاطب منهم
لأن الخطيبة مصيرها تعرف ان السياره مو سيارتك وبالتالي تطيح من عينها .. بكيفها ..
3 – اثناء الشوفه لا تستحي ابدا وقز البنت من راسها لرجليها ولا يهمك ابوها واخوانها لأن الشرع
( يدعمك ) وان قالوا شيء .. قل لهم حديث الرسول صلى الله عليه وسلم
” فلينظر اليها وتنظر اليه فأنه احرى ان يؤدم بينهما “
وكما قال الشاعر ( لسان الفتى نصف ونصف فؤاده **** فلم يبق الا صورة اللحم والدمِ )
<<<< يضيع مع اللحم في الضحايا خصوصاً التسبده يا بعد تسبدي..
لا يروح بالكم بعيد.
4– في الخطبة ان صار فيه مكالمات بعد ما يوافقون عليك .. فلا تصير لصقه وعلة وريد كل دقيقة داق
على البنت .. ( وينكم فيه ) ؟ وش سويتوا اليوم ؟ ما اشتقتي لي؟
وش تسوين ؟ انت على السرير وإلا في المقلط ؟ << يخرب بيت السؤال ؟
5 – لو ( كتبت كتابك ) على البنت قبل بفترة وبديت تأثث بيتك .. لا تاخذ البنت إلا علشان تختار
غرفة نومها بسسسسسسسسس ، وإلا باقي الاثاث اختاره انت وإلا خلها هي اللي تختاره كله ..
لانكم إذا بديتوا تطلعون مع بعض تختارون الاثاث .. فراح يطلع الاثاث مشكل تشكيلة عجيبه والوانه
كأنها ( شرّاب تكرونيه بالمربعانية عند الحرم )..
كذلك اضبط ميزانيتك على مستوى معين من الأثاث بمعنى … ما تشتري لي لوحه بــ 3000 الاف
والكنبات بـ 5000 الاف .. يعني ما فيه توازن وتروح تشتري لوحه ثانية من ( حلة بن دايل )
بــ 20 ريال ، ومن ايكيا بــ 150 ريال .. فيصير بيتك كأنه
( حراج ابن قاسم ) من كل بحر قطره.
فتصير مثل اللي بيتهم طين وعندهم( رولز رويس ).
6 – اياني وياك تظهر بشكل مثالي في الخطبة بل خلك على طبيعتك ، بحيث تقول للبنت هذا اناااا …
مو تصير حبيّب بالخطبة وصدام بعد الملكة.
ثالثا : ليلة الزواج :
ليلة العمر والليلة الوحيده اللي تحس فيها انك اهم واحد بالاحتفال .. فلا تصدق عمرك ويكبر
راسك.. خلك طبيعي
ولا تكثر من شرب الشاي والقهوة ليلة العرس بعدين تنتفخ مثانتك ، فتتورط ، لانه صعب إذا رحت
جلست مع العروس على ( الكوشه ) .. فجأه تقوم تقول بعد اذنك باروح الحمام … صدقني راح
تقول البنت إللي هذا اوله ينعاف تاليه
… فلنفرض انك قمت من الكوشه ؟؟
بعد ما تخلص هل بترجع وتجلس مع العروس مره ثانية ؟؟
وإلا بتطلع من هناك ؟ بالعربي .. انت بتبلش بلشة ما بعدها بلشة
أما إذا رجعت بيقولون الحريم ( جاه اسهال من الخوف من المدام)
اجل إذا راحوا الشقة بلحالهم وش بيسوي هالخواف.؟
فتصير علك في فم الرايح والجاي وملطشه للصغير والكبير.
2 – ليلة العرس ارفق على سيارة الرجال اللي انت متسلفها منه .. لانك ممكن تصدم لانك ما تعودت
انك تكون بسياره كشخه وجنبك بنت.
<<<<<<< وش دراك؟
3 – خلك ذوق واسحب يد البنت وحطها على ( القير حق السياره)
وحط يدك فوقها ولا تكثر تفغيص يدها لانك بتتهور وممكن يصير لك شيء وإلا يجيك ( شد عضلي )
بعدين تصدم باشاره >>> لاحقين خير ان شاء الله … لا تتصربع الله يطامنك باسمه..
4 – إذا جيتوا تدخلون البيت .. افتح الباب وخلها تدخل قبلك وامزح معها شوي ( خشي برجلك اليمين )
وبعد ما تدخلون ( ارقع ) ذيك الزغروته اللي تهز اركان البيت .. ثبت الله اركانك .
رابعا ً : سواليف ليلة العرس :
الكثير من الشباب في أي المواضيع يطرح ليلة الزواج وبرأيي انه بالامكان طرح مواضيع تتعلق بذكريات
الخطوبة .. والابتعاد عن المواضيع الرسمية .. بمعنى تجنب الآتي :
1– انتبه تتميلح او تنكت اكثر من اللزوم لان الموضوع سينقلب ضدك وبدال ما تصير وش زينك تصير ( كخا )
2 – انتبه تجيب طارئ ( أمك ) ليلة العرس ، وتقعد تقول لبنت الناس من اول ليلة ( انا بصراحه امي
أغلى امرأة عندي بالعالم ).. انا امي بصراحه ابيك تشيلينها فوق راسك ، انا امي بصراحه ما ابي احد
يزعلها ، انا امي بصراحه مالها غيري ..
الله ياخذ بليسك انت وامك لا هالحين ادخل والسبك بالعقال
<<<<<<<< يعصب احيانا بدون سبب مقنع .. ما عليه رجعت طبيعي .. نكمل …
مافيه شك ان الام قدرها غالي ومكانتها عظيمه بس لكل مقام مقال .. فما فيه مناسبه انك تجيب
طارئ امك ، ممكن تأجل الموضوع لليلة اخرى.
3 – امدح مكياج المدام ، وفستان فرحها لانها تعبت شهور حتى تظهر بهذا المظهر اللي انت
تتمتع فيه انت وعيونك المغمصه | …
حتى لو كنت ( كمخه ) في مواضيع الذوق واللبس ولا تفهم فيها شيء امدح وخلك عباراتك فيها
صدق بحيث تكون ( الكذاب الصادق ) ..
فهذا من شأنه انه يحسس المدام انها جميله بعينك ، ويرفع روحها المعنوية ، ويخليها تهضمك
يا ابو كوع ( بني )<<< مفروك لين قال بس فتغير من اسود الى بني .
4 – انبته ثم انتبه انك تصير عاطفي او تخق ومن اول ليلة تقول للبنت ( بصراحه انا احبك وميت فيك ) ..
لانها مؤكد انها مو مصدقتك ( ما امدى بسم الله تحبها ) .
بصراحه كثير من الشباب محروم من ( كل شيء ) <<< وافهموها .. عاطفيا و… و ..
واول ما نلمس يد تختلف عن يد صديقك ( الضب ) .. نخق وبسرعه نسعبل ونقول : آآآه الله
لا يحرمني منك ، احبك احبك احبك .. ويمكن بعد اسبوع اكرهك اكرهك اكرهك.>>> يااااي .
خلك ثقل وخلي سلوكك هو اللي يقول للبنت اني احبك مو اساليب ( قردنه ) احبك بعدين
تقول لها ( وش رايك نلعب عريس وعروسه )؟
ترى هالحركات ما تمشي على البنات التاليات .
معاني الكلمات : قردنه : محاولة اقناع جاده يتخللها وضع اليد على الكتف مع تــنــزيل
الرأس وكأنك بتقول سر للطرف الآخر مع الاتجاه ( لقرنة ) الغرفه.
خامسا : ملابس ليلة العرس
1 – بعد ما تفسخ ثوبك وشماغك وعقالك .. تروش الله يصلحك لانه ممكن
ريحتك تكون طالعه وانت ما تدري من كثر السلام والقلق اللي عشته في قصر الافراح ولا يهمك
انك راش لك كم ( بخه ) على الشعرات اللي بصدرك وبازن بها.
تنظفوا ( ابتل ) اعلمكم … همااااه ؟
بعد الانتهاء انتبه تلبس ملابس تظهر مفاتنك .. مثلا تجي بلبس داخلي وفانيلة علاقي وتصير
كأنك من ذولاك المصاريه اللي اسود وابيض ويتطببون على المسبح في النادي من
جماعة ( هاااااااااااااااااي شله )..
2 – انتبه تصير قروي وتلبس سروال ابو حبل ذاك اللي يخليك كأنك بقره رايحين يبيعونها
او بيجامة نوم مخططه فتصير كأنك ( حمار وحش ) يتكلم عربي.
اختر اللبس المناسب لجسمك ..
مثلا شورتات رياضيه اذا كان جسمك رياضي .. وإلا اذا كنت دب فخلك بالعقال والشماغ
والثوب استر لك وغير ملابسك إذا نامت المدام..
وفاجأها في الصباحية .
إذا كنت سمين البس ملابس فضفاضة شورت وفانيلة X X X L <<<< انتبه ترى ما اقصد القناة .
3 – للإحاطة فإن قمصان النوم النسائية ( مشققه ) وشفافه وكلها حركات .. انتبه يسول لك ابليس
وتقول ( اففف البنت خربانه ) .. من هالحين لبست كذا؟؟
ترى الموضة كذاااااا وتطوروا بأأأأأأ عجزت اعلّم فيكم .
إذا لبست لك المدام ( قميص نوم راااايق ) ترى مو معناهاااا ( طب عليّ ) .. خلك ثقيل
وإلا جيت هالحين أربط ثقالات برجليك.
ترى سمعت بقصه ان واحد طلق الزوجه ليلة الزواج بعد ما شافها لبست له ( لبس مشخلع )..
قال العم : اكيد انها داشره ؟ وحركاتها ما ني متطمن لها << طيب يا كولومبو.
<<<<< احتمت ( كبدي ) يوم سمع القصة من القهر .
سادساً : الخطة المحبوكه للقاء الحميمي :
1 – حذاري ثم حذاري وهذاني اقول لك ( حذاري ) .. تتحرش بالبنت جنسيا حتى لو كانت
زوجتك .. فكما يقال ( احذر ان تبدأ حياتك الزوجيه بحادث اغتصاب).
لان البنت مو معنى انها صارت زوجتك وكتبت هالوريقه يعني انها فصخت الحياء وتبيها تصير لعبة بين ايديك .
2 – اجعل بداية حياتك الزوجيه قصة رومانسية متعددة الفصول .. ليلة الزواج تكون بمثابة لقاء
بين اثنين للتعارف ما فيه إلا الحديث وإذا كثرت امسك يدها ولا تتعدى لاشياء اخرى ..
عسى يدك الكسر ( ممدين ) همااااه .
3 – اليوم الثاني انتبه تستقبل أية زيارات من الاهل .. او من اهلها .. واعزمها في مطعم راقِ
ولا تجلس تجرجر بالبارتشنز وتقعد تناظر فيه فتحه صغيره مع هالجهه او مع ذيك ..
وتسدد فيها وتصير كأنك مهندس ( صنادق حمام ).
اركد وخلك طبيعي وإلا قالت البنت وش ( هالعومه ).
4 – في ليلة اليوم التالي غالبا يكون فيه عشاء عند اهل الولد تعشوا واطلعوا ورح انت وياهااا
( كوفي شوب ) وانتبه تقرأ الجرايد او المجلات , وعطها وقتك كله.
5 – اليوم الثالث :
حاول تسافر بها عمره بعدين لمدينة جده لسكان المملكة العربية السعودية .. او مدينة اخرى
لسكان الخليج .. او ( لقريح وابو زنه لباقي الدول ).
6 – اللقاء الحميمي لا يمكن تحديد الوقت المناسب له .. بل يعتمد على الظروف والمتغيرات
والتي لا يمكن ان اعرفها فأنت الذي في ارض المعركه ، فحدد أنت ؟ لانه لا يمكن يجي احد يحارب عنك .
واللي ما يجي اليوم .. يجي بكرا .
اخترنا لك:
- وقفة مع عجائب عام 2011 الرقمية
- صور من كل مكان _ الجزء الأول
- فيديو : معركة الأنفس الشحيحة من أجل تانج بأسواق كارفور + لقطات لإعصار تسونامي مرعبة + عملية حسابية غريبة
- خبر + صور : حينما تسرق السعودية من أبنائها + غلطة كبيرة في موقع الخطوط السعودية + الدولة القعيطية
- أجمل أغرب أفخم .. + الفرق بين الشباب والبنات بعد العزيمة ..!!
- فيديو : آباء سفهاء أجرموا في حق أطفالهم ..!!
- تحذير من اللمبات الموفرة للطاقة ..!!
- صور + صوت : جماهير مانشستر سيتي + ماكدونالدز صار يبيع فول وعدس + محشش يبي يسافر تركيا + فضائح طلاب
- صور منوعة جميلة – الجزء الثاني
- جاكيت وفراش للنوم في آن واحد غريب وعجيب + وداعاً للإشارات التقليدية + عاشق + سكرتي نصاب
مواضيع أخرى أرسلت بواسطة ensan 3adi:
تعليقات:
29 عدد التعليقات على “سؤال لكل عزوبي .. يتسدح بالملحق ؟”
-
حـــــــــــــربيه يعلق:
14 فبراير, 2010 في الساعة 2:48 ص
يسلمووووensan 3adi
يعطيك الف عافيه على الموضوع…… -
منو الحلوه يعلق:
14 فبراير, 2010 في الساعة 10:24 ص
ههههههههههههههه وربي جنان واسلوب رائع بمعنى الكلمه؟
بس بسألك ..انت سعودي؟ خخخخ اخيرا تحقق حلمي وشفت سعودي مثقف ورومنسي
بالتوفيق للعرسان وعقبالي يارب شبعت عزوبية -
واحد يكره اللطش يعلق:
14 فبراير, 2010 في الساعة 12:59 م
ليتك كتبت منقووول لأن هذا ايميل يتداولونه من مدة
ياحبكم للطش وهذا يضر بالقروب ترى -
هديل المشاعر يعلق:
14 فبراير, 2010 في الساعة 2:58 م
الصراحة موضوع رائع بكل ما تحمله الكلمة من معنى
عجبني اسلوبك في الطرحك و كلامك اللي يفتح النفس و يضحك
وصلني الموضوع على الايميل و قريته و قلت لازم انزله في منتداي بعد اذنك طبعاً
يعطيك العافية اخوي
و لا تحرمنا من قلمك المبدع
-
سلطان يعلق:
15 فبراير, 2010 في الساعة 12:52 ص
اشكرك ensan 3adi
صراحة متعوب عليه
يا ناس انا موظف حكومي ووصل عمري الثلاثين والا الحين ما تزوجة المشكلة ان عندنا عاداة في القبيلة ما تتزوج الى إذا اتزوج اخوك الكبير ؟؟ وش ذنبي اذا اخوي مايبي الزواج .. والله اكتب من قهر فيني .. كل سنة اقول السنه الجايه تنحل وابتزوج كل سنه على هالحال ,,,ما كتب هذا الكلام الا اني اتمنى كل من يقرى كلامي يدعو لي بالزواج ..
-
صقرقريش يعلق:
15 فبراير, 2010 في الساعة 7:45 ص
سلام عليكم
ياخوي طولتها وهي قصارخصوصا أيام الدخلة عزالله إن بنت الناس بتهج لهلها إلكان هذا من أولها بعد ثلاثة أيام تتلاقون هذا عنده سكر الله يشافيه.
هههههههههههههه
مشكور علي الطرح
تحياتي -
أبو محمد_ غزه يعلق:
16 فبراير, 2010 في الساعة 10:23 ص
السلام عليكم ورحمة الله
إن الله لا يحب الجهر بالسوء
مع احترامي لورقات لكن هذا الموضوع لا يرقى لمستواها
-
emy يعلق:
16 فبراير, 2010 في الساعة 5:30 م
يآجمآعة مالكو قالبين عالموضوع.. الموضوع لمجرد المرح والضحك
وبصرآحة الاسلوب ضحكني بجد ههههههههحلوو
-
بردآ وسلام يعلق:
20 فبراير, 2010 في الساعة 12:56 ص
حلو الموضوع والأحلى إنو فيه ناس تفكر بهالطريقه…بالنسبه للناس اللي ماعجبه الموضوع طيب ليه تقرونه!!! والأخ سلطان الله يكتب لك الخير وتتزوج هالسنه يارب ويرزقكبااللي تستاهلك ويهدي اخوك ويتلحلح ويزوج أخواني وكل اللي نفسهم يتزوجون من بنات وشباب آمــــــــــــين(:
-
ابو مقبل يعلق:
20 فبراير, 2010 في الساعة 2:19 ص
يآخي موضوعك فيه مجآهره بالمعصيه .. أجل اتسمع اغآني واشوف كليبآت
مآهقيتهآ منكم يآورقآت … وهالسخآفآت تأثر في سمعتكم … كل الشكر
-
كلي الم يعلق:
20 فبراير, 2010 في الساعة 3:23 ص
صراااحة ضحكت من قلبي اسلوبك في التعليق خلاني اضحك وانا لوحدي بصوت عبالي صراحة من جد مطابقة لحالتنا وخاصة لما تأكل سمك ههههاي اما بالنسبه للموضوعك من جد انو في ناااس مره متخلفه وتطجها طج
وانت عطيت خطوات كثيرة وهامة لكل شاب سعودي مقبل على الزواج اويفكر مستقبليا في الزواج اوههههاي فيه شويت محنة…. وشكرااا -
رانســي يعلق:
20 فبراير, 2010 في الساعة 3:54 م
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه قسم خطيـــر تووحفه وانتم ياللي تقولون مجاهرة بالمعصية هذا من باب المزح المزح
شكريات ههههههههه
-
ذيــــــــاب يعلق:
21 فبراير, 2010 في الساعة 4:33 ص
السلام عليكم
لن اعلق على الموضوع لأنه بالأساس ليس من جهدك
فأين حقوق الاخرين او بالاحرى كان يجب عليك كتابة ( منقول )
التي لا اعتبرها نقص في الشخص بل أمانه والأهم شكر صاحب الموضوع الأصلي
فهذا الموضوع كتب من شخص يدعى ( معاند بحر ) في منتدى دلوعة العرب
وكان الموضوع بعنوان ( العزوبي يدخل هنا قبل لايصدي ظهره ) وتم انشائه
في تاريخ 05-30-2008, في الساعه 03:50 AM فكيف تأخذ جهد غيرك يا عزيزي
وارجو ان لايحذف التعليق لأنه حق يجب ان نوضحه لجميع من يقرأ هذا الموضوع
فجهود الناس مهما ( غُيبت ) لابد لها ان تظهر يوماً ما كما هو حاصل الأن
علماً بإني لا أسوق للكاتب الأصلي إنما حقيقه لن أصمت تجاهها ياناقل الموضوع
-
أبو عبادي يعلق:
21 فبراير, 2010 في الساعة 8:15 ص
أشكرك صاحب الموضوع على نقله للموضوع هنا ,
الأخ ذياب , شكل خويك اللي تقوله ناقل الموضوع بعد 🙂
يا غالي هالموضوع مكتوب قديم , أنا بحثت في قوقل عنه ..
ولقيت نتائج لنفس الموضوع مكتوبة عام 2005 يعني قبل 5 سنوات ..
شف هذا الرابط كمثال , ولاحظ تاريخ إنشائه:
http://vb.alnassrclub.com/t93252.htmlوالموضوع هذا يتناقل على الايميلات من فترة طويلة ..
فلا تجلس تسوي لي فيها مؤرخ 🙂
-
MHND يعلق:
25 فبراير, 2010 في الساعة 1:36 م
هههههههههههههههههههههههههههههههه
والله انك خطير…………….تعجبني
-
اسيرة حرة يعلق:
2 مايو, 2010 في الساعة 1:48 ص
لاحظوا ردود الرجال كلها نكد ……………..ياخي اضحكوا شوي عالموضوع وخلص ولا لازم النكد يا نكد؟؟؟؟؟؟؟؟؟؟؟؟
-
فهد~ الرياض يعلق:
19 مايو, 2010 في الساعة 4:39 ص
يعطيك الف الف عافيه بــصراحه موضوع حلو~~
وكثر من ها الامواضيع تراها زينه < عزووبـيملاحظه*
الناس اللي علقو با ان هذا موضوع منقول او قديم يعني لازم التجريح او لازم تبين انك مثقف ومار عليك المموضوع ياخي على الاقل اشكره مو شرط تبين لنا انه قديم حرقتو علينا ها الموضوع بهذي التعليقات الله يهديكم
الخالق با السماء والحاسـد با الارض
عجزت وانا اقولكم ~~ همـآآه -
غريبة يعلق:
13 يونيو, 2010 في الساعة 12:05 م
لم أتوقع أبدا أن تنشر “ورقات” هذا المقال السيء << مع احترامي لكاتبه
-
سلطان يعلق:
5 فبراير, 2011 في الساعة 2:12 م
كل الامور هاذي خابرها بس متى اتزوج ياناس اااااااااه يازين الزواج بس فله فله فله فله ادعولي ان الله يفك ازمتي هههههههههه
-
yasinnour يعلق:
22 يونيو, 2011 في الساعة 7:23 م
سلام عليكم هدة تعليقي عاالعموم عبارة عن اعلان حقيقي لطلب زواج النجدةةةةةةةة ارجوكم انا يسين الليبي مسلم محافظ باعتدال مطلق عمري خمسه واربعين مقيم في اورباطولي 182 وزني 77 لوني حنطي مايل الي البياض ابحث عن امراءة مسلمه محجبه من اي جنسيه كانت والله يوفق الجميع
-
رونق الجمال يعلق:
2 يوليو, 2011 في الساعة 5:38 م
حلووووووووه الرززززه الي بتسوووونهااااا … عااااااد بنااااات ها ااااليومين كلش رزه. هههههههه
-
sno يعلق:
14 مارس, 2013 في الساعة 5:18 م
قريت ذا الموضوع وانا عزوبي 🙁 نفسسسست بقوة وضاق صدري اححححححح ياقلبي